« Òc » a un departament « País catalan »

Lo Partit de la Nacion Occitana ditz de

« Òc » a un departament « País catalan »

Dòna Hermeline Malherbe, presidenta del Conselh Departamental dels « Pirenèus Orientals » anóncia una demarcha en vista del cambiament de nom del departament.

Mantun nom seriá propausat d'aicí la fin d'aquela annada al vòte dels residents, per poder presentar al governament francés una demanda correspondent a la causida qu'auràn exprimit.

Lo Partit de la Nacion Occitana felicita Dòna Malherbe a l'encòp per aquela demarcha, que respond a una afirmacion creissenta per la populacion de son identitat catalana, e obrís de novèlas pespectivas per l'avenidor institucional del territòri, e per son caractèr democratic.

Dins la republica jacobina, un tal cambiament de nom d'una collectivitat territoriala, plan rar, necessita un decret del governament central.

Los noms dels departaments son estats determinats per la republica jacobina a la fin del sègle XVIII, sustot per escafar tota identitat culturala e lingüistica.

En dos sègles, sols sièis departaments an obtengut de cambiar de nom, per abandonar un qualificatiu jutjat prejudiciable, coma aqueles los qualificant de « bas » o « inferior ».

Atal los departaments dels « Pirenèus Basses » e dels « Còstas del Nòrd » son estats rebatejats « Pirenèus Atlantics » en 1969, e « Còstas d'Armor » en 1990, modificacions qu'avián demandadas l'un e l'autre en 1962, - probablament l'espèra de vint e uèch ans pel segond fa pròva d'una reticéncia del poder central a utilizar un tèrme breton dins lo nom d'un departament « francés ».

Se crenhiá una censura analòga per la causida de « Occitània » per la region.

Segon una consulta en linha de sos auditors per « França Blava Rosselhon » la denominacion favorida seriá de luènh « País Catalan » amb 56% de las causidas , luènh davant lo manten del nom actual 18% , « Pirenèus Catalans » 17% , « Pirenèus-Mediterranèa » 6% - e « País Catalan Fenolhedés » 1% ¬.

Çò que confirma l'estacament de la populacion del departament, mantun còp exprimit dempuèi 2015, a son identitat catalana.

Lo Partit de la Nacion Occitana rampèla qu'aviá condemnat las fusions arbitràrias de regions decididas per François Hollande, en demandant l'estatut de region a despart entièra sustot per la Catalonha Nòrd ; pendent la consulta de la populacion de la region sus la causida de son nom, lo Partit de la Nacion Occitana aviá pres posicion per las opcions « Occitània » e « Occitània – País Catalan » ; aquela darrièra opcion, probable mai satisfasenta per l'opinion catalana, èra pas estada seguida per la populacion plan majoritàriament occitana dels dotze autres departaments de la region.

La revindicacion d'una region catalana de plen exercici deu reprene una vigor novèla amb la reconeissença melhora de l'identitat catalana del departament, dins un contèxt ont las revindicacions d'autonomia regionala se desvolopan.

L'amistat e la cooperacion istoricas occitanocatalanas an tot a ganhar a la reconeissença mutuala de lor alteritat.

Dins aquela perspectiva, lo Partit de la Nacion Occitana convida d'una part los occitans del Fenolhedés, plan minoritaris dins lo departament, a sostenir l'afirmacion de l'identitat catalana pel cambiament de nom propausat e a demandar lo restacament del Fenolhedés al departament vesin d'Aude.

Lo Partit de la Nacion Occitana saluda l'actitud exemplara dels independentistas catalans de la Generalitat de Catalunya de cap a la minoritat occitana (aranesa) de son territòri : reconeissença e cooficialitat de la lenga occitana, proteccion de la cultura occitana dins las institucions, l'espaci public e l'educacion.

Convida las institucions del departament catalan e los militants de son identitat catalana a ne s'inspirar dins la reconeissença de l'identitat occitana del Fenolhedés e lo sosten de las demandas de redescopatge dels departaments e mai generalament de las regions en foncion de las identitats culturalas e lingüisticas.