Crisi migratòria a Maiòta

Qualas solucions per Maiòta ?

La crisi migratòria a Maiòta qu'a donat luòc recentament a una operacion militara francesa mirant, demest autras causas, los estrangièrs en situacion irregulara (Comorians per la màger part), mena a examinar la legitimitat de l'estatut actual de l'illa qu'amb Anjoan, Granda Comòra e Moéli constituís l'archipèl de las Comòras.

Aquela anciana colonia francesa votèt massissament per referendum dos còps per mantenir un ligam amb França al contra de sas vesinas que proclamèron unilateralament lor independéncia lo 6 de julhet de 1975.

Vertat es que la populacion de l'illa èra estada somesa a una intensa propaganda anti-independentista.

Lo referendum del 29 de març de 2009 aviá per objècte de permetre a la populacion de Maiòta, alara una collectivitat departamentala (collectivitat territoriala a estatut particular) francesa de l'ocean Indian, de se prononciar sul passatge de Maiòta a un estatut de departament de la Republica francesa.

La populacion aprovèt la departamentalisacion a una plan larga majoritat fasent de Maiòta lo 101en departament francés.

A l'encòp departament e region, Maiòta es administrada pel conselh departamental.

Segon sos principis etnistas, lo Partit de la Nacion Occitana se deuriá logicament prononciar per la reünificacion de l'archipèl de las Comòras dont Maiòta parteja la lenga e la cultura swahilis e quitament per l'unitat de la nacion swahili dont l'aira etnolingüistica cobrís un larg territòri en Africa de l'Èst.

Pasmens, e mai se los Maoreses son etnicament alienats, lor volontat de demorar « francés » es incontestabla e los interèsses geopolitics de la poténcia coloniala francesa pesan fòrça.

Lo desfís es de convéncer los Maoreses qu'an interès a l'independéncia e pas necessàriament sul pic a l'integracion dins l'Estat de las Comòras ont regna una granda instabilitat politica.

Segon lo Partit de la Nacion Occitana, aquò poiriá passar per un periòde transitòri d'autonomia amb cotutèla internacionala associant l'ONU, l'èx poténcia coloniala francesa e los Estats vesins (las Comòras, Madagascar, Kenya etc.)

 Cal pas persistir ni dins l'estatut de departament que risca d'impausar als Maoreses l'integracion e l'assimilacion a França ni dins un estatut d'autonomia tant aprigondit que siá.

E mai se Maiòta veniá totalament independenta, aquò excluriá pas d’acòrdis de cooperacion amb l'anciana poténcia coloniala e, a mai o mens long tèrme, l'integracion dins l'Estat de las Comòras.

Lo passatge progressiu de l'autonomia a l'independéncia es un objectiu mai realista que lo de l'integracion precipitada de Maiòta a l'Estat de las Comòras.

Maiòta