/image%2F0893414%2F20140115%2Fob_27fd6a_communique-jpg)
Visca la republica de Catalonha e Aran !
A Barcelona, lo Parlament catalan ven de proclamar l’independéncia.
Lo Partit de la Nacion Occitana apròva sens cap de reserva aqueste acte fòrt e coratjos.
Las empachas a l’independéncia e a la creacion vertadièra d’aquesta republica catalana son nombroses.
La magèr part dels Catalans ostils a l’independéncia votèron pas lo jorn del referendum del 1er octobre.
Lo Senat espanhòl a la demanda del primier menistre, Mariano Rajoy, ven de votar la mesa jos tutela de la Generalitat, çò que vòl dire que l’autonomia es jospenduda, que los bailes catalans seràn destituits e benlèu empresonats per sedicion, e que la television e los medias catalans seràn badalhonats.
Es probable que lo govern espanhòl jos-estima lo sosten a l’independéncia en çò dels Catalans, e son intransigencia aura bravament contribuit a lo far crèisser.
Se los Catalans se mobilisan tròp per carrièras, se pòt pas malurosament fòrabandir l’idéa que la policia e l’armada espanhòlas intervendràn, çò que mostrariá la cara vertadièra de la « democracia » espanhòla, malgrat las injonccions de l'UE de far pas usatge de la violéncia.
La novela republica serà pas reconescuda per Espanha, per l’Union europenca ni per un nombre significatiu de paises sòcis de l’ONU.
Es pr’amor d’aquò que, pel moment son existencia demorarà simbolica.
Totun, los independentistas catalans auràn pres data. Las forças favorablas a l’estatu quo territorial en Euròpa riscan de trionfar provisòriament malgrat lo dreit, reconescut internacionalament, dels pòbles a s’autòdeterminar.
Lo Partit de la Nacion Occitana, qu’es per l’independéncia d’Occitania, saluda lo vòte del parlament catalan, pòrta lo seu sosten frairenal als independentistas catalans e los encoratja a perseguir dins lor luta pacifica contra l'Estat espanhòl dictatorial.
Tard o d’ora, e benlèu plan mai d’ora que çò que se pensa, la republica de Catalonha e d’Aran s’impausarà a Espanha e al demai del monde. Sempre endavant !
27/10/2017
Visca la republica de Catalonha e Aran !