/image%2F0893414%2F20140115%2Fob_27fd6a_communique-jpg)
Comunicat
Lo Partit de la Nacion Occitana e la crisi agricòla
Una crisi agricòla grèva toca los noiriguièrs de pòrc e de bovins dins l’Estat francés ; los noiriguièrs de polalha independents, nombroses en Occitània, son al meteis temps victimas de mesuras presas pel govèrn per empachar l’espandiment de la gripa aviària.
Lo Partit de la Nacion Occitana denoncia los responsables d’aquelas crisis : la Commission Europèa, los govèrns franceses successius, de drecha coma d’esquèrra, e la FNSEA. Lors causidas favorizan los grands cerealièrs del bacin parisenc, los grands grops de l’agro-alimentari e de la distribucion, al prètz de la desertificacion de nòstres campestres.
Aquelas causidas son :
- l’agrandiment incessant de las bòrdas dins l'espèr d’ipoteticas economias d'escala,
- una agricultura "productivista", que fa de maites agricultors de « salariats » de l’industria agro-alimentària,
- la monocultura e lo monoelevatge "intensius", e mai « fòra sòl » amb de consequéncias sanitàrias e environamentalas desastrosas,
- las produccions a còsti bas per l'exportacion mentre qu’una agricultura de qualitat e de proximitat seriá benefica als agricultors e als consomators, especialament occitans,
- l'abandon de l'agricultura aquí ont aquel esquèma intensiu e productivista pòt pas èsser aplicat, mai que mai dins la montanha.
Lo Partit de la Nacion Occitana demanda qu'al lòc de pretendre concurrenciar los païses a còsti bas los poders publics favorizen las produccions de qualitat e de proximitat. Devon especialament metre en òbra o encoratjar :
- una armonizacion sociala e fiscala dins l’Union europèa, necessària per una concurréncia « non falsada »,
- l'agricultura biologica e l'agricultura « rasonada »,
- las culturas que necessitan mens d’aiga, coma lo sòrgo per remplaçar lo milh,
- l'elevatge de raças autoctònas, mai adaptadas a lor environament,
- la produccion de lach de qualitat e sa transformacion dirècta pels noiriguièrs,
- l’elevatge ovin e cabrenc aquí ont es tradicional.
Los noiriguièrs independents de polalha, que practican un elevatge extensiu de qualitat, devon pas èsser las victimas del vuèg sanitari decidit pel govèrn dont los grops de l’agro-alimentari patisson pas gaire.
Lo Partit de la Nacion Occitana reivendica per las regions occitanas de poders e de mejans renfòrçats, especialament per lor agricultura, pr’amor de poder agir pels interèsses dels agricultors occitans, que son diferents de los del Nòrd de França.
http://lo.lugarn-pno.over-blog.org/
10 carrèra de Romàs
47000 Agen
06 76 47 32 12
7 de març de 2016
Lo Partit de la Nacion Occitana e la crisi agricòla.