Lo Partit de la Nacion Occitana e l'eleccion presidenciala francesa

 Lo territòri supausadament nacional de l'Estat francés constituit en « republica una e indivisibla » correspond pas solament a la nacion francesa e a sa lenga lo francés. Inclutz d’autras nacions : Occitània, Bretanha, lo Nòrd de la nacion basca, lo Westhoek de lenga flamenca, Alsàcia e la Lorena francica , Corsega e Rosselhon de lenga catalana sens parlar dels pòbles d'otramar.

Levat la nacion francesa, cap d’aquelas autras nacions gausís de la reconeissença oficiala de son identitat, de sa cultura e de sa lenga.

Cap dels 12 candidats a l’eleccion presidenciala a un programa que corresponda a lo del Partit de la Nacion Occitana.

En consequéncia, aiceste s’absten de donar quina que siá consigna de vòte.

Lo Partit de la Nacion Occitana compren que d’unes Occitans, conscients de lor identitat, vòlgan boicotar l'eleccion presidenciala francesa prevista per la constitucion de la Vena republica.

Una constitucion que reconeis son que de ciutadans « franceses » e permet d’elegir un « monarca republican ».

Compren tanben que d’unes sián temptats de votar blanc mas a pas cap d’impacte sul resultat de l’eleccion.

Atal meteis votar nul, en escrivent per exemple « Occitània liura » sul papieron de vòte a ges d’eficacitat que l’inscripcion serà legida son que per un sol dels escrutadors.

Lo Partit de la Nacion Occitana, aprèp aver espepissat las  posicions dels 12 candidats a l’eleccion presidenciala (mai que mai sus la diversitat lingüistica, la descentralisacion e l’autonomia de Corsega), saluda las de Joan Lasala (regionalista declarat e sosten de Bastir Occitània) o de Yannick Jadot o encara de Felip Poton.

Correspondon mai o mens al drech dels pòbles a dispausar de se.

Lo Partit de la Nacion Occitana regeta lo president sortent, lo jacobin Emmanuel Macron (que tenguèt cap de sas promessas) e denóncia los autres candidats que sián ultra-jacobins coma Marine Le Pen, Éric Zemmour, Jean-Luc Mélenchon (adversari ferotge de las escòlas immersivas) o que manifesten pauc d’interès per las revendicacions dels pòbles de França.

Al 2^ond torn, le Partit de la Nacion Occitana recomendarà probable l’abstencion.

eleccion presidenciala francesa