/image%2F0893414%2F20140115%2Fob_27fd6a_communique-jpg)
Comunicat
Primièra votacion de las eleccions regionalas de junh de 2021
Lo Partit de la Nacion Occitana deplòra tant en Occitània coma dins lo demai de l’Estat francés un taus d’abstencion dels bèls per las eleccions regionalas e departamentalas que confirma e amplifica aqueles constatats per las eleccions europèas de 2019 e las eleccions municipalas de mars de 2020.
Es lo signe, en defòra de las contingéncias ligadas a la pandemia del còvid 19, d’una desfisança de las grèvas dels electors de cap a l’oferta politica. Lo refus de la politica politiciana e de l’obsession per l’eleccion presidenciala de 2022 marginaliza las autras eleccions dins un sistèma electoral qu’es lo d’una monarquia republicana que sonque i compta vertadièrament la centralitat del poder a París.
Lo Partit de la Nacion Occitana sosteniá doas listas occitanistas :
La lista Bastir Occitània menada pel Joan-Luc Davezac dins la region administrativa Occitània e la lista Òc per Provènça en region PACA menada per Hervé Guerrera. Sus aquestas doas listas i èran de sòcis del PNO.
La lista Bastir Occitanie obtenguèt pas que 0.76 % per 11 509 voses.
La lista Òc per Provença, per contra obtenguèt 2.18 % per 25212 voses.
Non èra lo primièr còp qu'una lista occitanista autonòma èra presenta per d’eleccions regionalas. En 2004 dins la region Lengadòc-Rosselhon, la lista menada pel regionalista Christian Lacour aviá obtengut 1,27% a la primièra votacion per 13538 voses. Sus aquesta lista sostenguda pel PNO i èran tanben de sòcis del nòstre partit, demest eles lo regretat President Jacme Ressaire.
Doncas, dins la region administrativa Occitania (regropant las ancianas regions Miègjorn Pirenèus e Lengadòcc-Rossilhon) fòrça mai poblada, la lista Bastir Occitània obtenguèt una resulta plan inferiora. 17 ans apuèi auriam poscut pensar que lo nom de la region, Occitània, causit al cap d'una consulta dels estatjants èra lo signe d’una presa de consciencia de l'identitat occitana e auriá de retombadas sul plan electoral se los occitanistas se portavan a las eleccions, Es pas çò esperat que s’es passat quitament se la comparason entre 2004 e 2021 deu èsser facha damb lo cap dels dets. I a de que s’interrogar sus aquesta recuolada electorala.
Per contra dins la region PACA (Provènça), èra lo primièr còp qu'una lista occitanista autonòme participava a las eleccions regionalas.
La resulta de ÒC PER PROVÈNÇA ! es fòrça encoratjant.
L’estrategia de conquèsta del poder local e regional pel movement politic occitan amb o sens alianças que promòu lo PNO es exigenta e se marca dins lo temps long. Acabarà per pagar.
Per la segonda votacion, en region PACA, lo Partit de la Nacion Occitana demanda a las electrises e als electors de barrar lo camin al Recampament Nacional.
21 de junh de 2021
/image%2F0893414%2F20210624%2Fob_c4b511_pno.jpg)