Overblog Suivre ce blog
Editer l'article Administration Créer mon blog

Lo Partit de la Nacion Occitana e lo segond torn de

l'eleccion presidenciala francesa

Lo Partit de la Nacion Occitana auriá desirat legir dins los programas dels candidats a l'eleccion presidenciala francesa, lors engatjaments o lors declaracions anant dins lo sens de sas reivendicacions, mai que mai :


- dotar las regions de competéncias dins los domenis economic, cultural e politic e de mejans correspondents, per lor permetre de respondre als desirs de las populacions.

- restructurar lors territòris per que correspondan als ligams socials e culturals de las populacions e per que siá abolit l’abandonament de las periferias al profièch de las metropòlis que solas tiran profièch de la « mondializacion ».

- reconeisser e promòure nòstra lenga e nòstra cultura occitanas e las valors de nòstra civilizacion.

Lo Partit de la Nacion Occitana a constatat que cap dels onze candidats del primièr torn s'èra sufisentament exprimit dins aquel sens.

D’unes, al contrari, portavan lo flambèl de l’imperialisme francés descomplexat, o pretendián voler lo ben de las lengas "regionalas", mas demandavan que per aquò se faga de clucons fisança a la Republica francesa.

De nòstres enemics averats, demòra pel segond torn Marine Le Pen e son partit, que atiran cap a eles los vòtes de millions d'Occitans victimas de la marginalizacion de lors territòris e del despoderament de nòstra cultura.

Lo Partit de la Nacion Occitana apèla las electritz e electors a li copar terren, e invita los democratas a lo retrobar per prepausar una alternativa occitana a la desesperança que se tradusis dins las urnas per de vòtes atal.

Lo Partit de la Nacion Occitana fa pas fisança a Emmanuel Macron, perque los qualques elements positius que podèm identificar dins sa communicacion foguèron enonciats d’un biais talament discret que fan pas d’engatjaments essencials del candidat. Son benlèu sonca de responsas oportunistas.

Lo Partit de la Nacion Occitana compren que d’unes de sos amics vòlgan metre en abans lo vòte « util » per Macron per copar terren a Marine Le Pen.

Condemna pas tanpauc los que creson a las promessas electoralas murmuradas per Macron, quitament se podèm crentar que sián illusòrias.

Prepausa als electritz e electors occitans de manifestar puslèu lor malcontentament per un vòte blanc o nul, per exemple amb un bulletin portant la mencion "Occitània Liura", e mai per l’abstencion.

Occitània Liura

Occitània Liura

Tag(s) : #OC, #Occitan