Overblog Suivre ce blog
Editer l'article Administration Créer mon blog

Lo Partit de la Nacion Occitana saluda la naissença del movement politic nòrd-catalan : "Oui au Pays Catalan"

  Dins l'amira de son objectiu qu'es l'independéncia de totas las nacions e pòbles del monde, lo Partit de la Nacion Occitana saluda la naissença, lo dissabte 15 d'octobre de 2016, a Perpinhan, del movement politic "Oui au Pays Catalan". Aqueste es nascut del besonh qu'an los Nòrd-Catalans d'aparar lor identitat nacionala pròpria e de prene en mans lors afars politics. Al moment del Congrés fondador, los intervenents son estats nombroses a plànher que l'identitat e las especificitats economicas nòrd-catalanas èran mespresadas per las instàncias politicas en plaça, actualament bailejadas pels partits imperialistas franceses. D'aquí l'interés pel pòble catalan d'aquesta region de mestrejar la gestion de son territòri.

  L'objectiu del moviment "Oui au Pays Catalan" es per l'immediat la creacion d'una region catalana pròpria amb l'estatut juridic de collectivitat territoriala Unica (CTU) que se substituïriá a l'actual departament dels Pirenèus-Orientals e cumulariá tanben las competéncias actualament tengudas per la region. Aquò's ja lo cas per Corsega e las autras nacions ultramarinas jos dominacion francesa.

  Per contra lo Fenolhedés de lenga occitana, acutalament dins lo departament dels Pirenèus orientals, deu demorar dins la region Occitània-pirinèus-mediterranèa.

  Dins son amira etnista, lo Partit de la Nacion Occitana a sempre militat per una collectivitat territoriala pròpria a Catalonha del Nòrd.

  Emai se trachèsse pas actualament que d'un movement politic, lo P.N.O. pensa que "Oui au Pays Catalan" va dins lo sens de l'Istòria e participa logicament a una estapa del procèssus global de liberacion nacionala de Catalonha. Lo novèl movement politic catalan, qu'a per vocacion de venir majoritari sus son territòri, pòt comptar sus lo sosten frairal e la solidaritat del Partit de la Nacion Occitana.

"Oui au Pays Catalan"

"Oui au Pays Catalan"

Tag(s) : #OC