Overblog Suivre ce blog
Editer l'article Administration Créer mon blog

Lo Partit de la Nacion Occitana e lo vòte sul nom de la region Lengadòc-Rosselhon-Miègjorn-Pirenèus

Un mes de temps, del 9 de mai al 10 de junh, los estatjants de las doas regions Lengadòc-Rosselhon e Miègjorn-Pirenèus regropadas arbitrariament aguèron l'escasença d'exprimir lor causida sus internet o per talhs de premsa entre 5 opcions.

Amb 44,90 del 100 e 91598 sufragis Occitània es l'opcion que çò sembla batèt largament las autras quatre.

Tot ben qu'aguèsse preferit l’opcion Occitània Centrala que foguèt pas retenguda, lo Partit de la Nacion Occitana participèt a la mobilizacion en tot recomandar fauta de quicòm de mielhs de votar per Occitània o Occitània-Pais Catalan.

Pel PNO aquesta resulta es simplament lo rebat d'una consciencia occitana de las fòrtas que despassa las chifras electoralas tradicionalas de l'occitanisme.

Lo PNO ramenta que dins l'Estat Francés, las ancianas regions administrativas d'Aquitània, Lemosin, Auvernha, Provènça Aups Costièra d'Azur e los dos departaments de Droma e d'Ardecha son tanben Occitània.

Occitània se pòt pas e se deu pas solament resumir a las doas ancianas regions Lengadòc-Rosselhon e Miègjorn-Pirenèus.

Apuèi lo 24 de junh de 2016, quitament se Occitània es causida per nom de la nòva region Lengadòc-Rosselhon Miègjorn-Pirenèus pel vòte del Conselh Regional, lo Partit de la Nacion Occitana contunharà de promòure l’idèa d’Occitània Centrala. Denonciarà de longa los efièchs d'una reforma territoriala que se faguèt d'un biais tecnocratic e sens concertacion e que amai en matièras legislativas, fiscalas e d’educacion balha cap de poder a las novèlas regions.

comunicat del 17/06/2016

nom de la region Lengadòc-Rosselhon-Miègjorn-Pirenèus.

nom de la region Lengadòc-Rosselhon-Miègjorn-Pirenèus.

Tag(s) : #OC