Overblog Suivre ce blog
Editer l'article Administration Créer mon blog

Lo Partit de la Nacion Occitana e la segonda votacion de las eleccions regionalas de decembre de 2015

Lo 13 de decembre de 2015 se debanarà la segonda votacion de las eleccions regionalas.

Un còp espepissadas las resultas de la primièra votacion sus l’ensems del territòri occitan lo Partit de la Nacion Occitana constata, l’inquietanta montada en poténcia de fòrças que lor tòca es la substitucion de l’identitat occitana per una identitat francesa ultrà chauvina.

Tant per la primièra votacion coma per la segonda, quina que siaga la region, demest las listas presentas, n’i a ges que se declare a favor de vertadièrs poders decisionals e financièrs per de regions occitanas autonòmas o que religue las preocupacions de la populacion occitana amb l’identitat occitana o a la pèrdia d’aquela d’aqui.

Lo Partit de la Nacion Occitana demanda a las electritz e als electors temptats pel Front Nacional, de soscar a las consequéncias catastroficas del seu vòte per un partit demagogic e ultrà chauvin que resòurà pas lors problèmas e de ne tirar las conclusions.

Volèm pas caucionar per una crida a votar la politica e la comunicacion del poder central francés e dels notables que lo relaian en Occitània. Son los principals responsables de l’enantiment preocupant del FN en Occitània.

Lo Partit de la Nacion Occitana donc balha pas cap de consignas de vòte en Aquitània-Lemosin Peitau-Charenta, en Miègjorn-Pirenèus e Lengadòc-Rosselhlon, en Auvèrnha, Dròma-Ardècha amb Ròse-Alps, Provènça-Alps-Costièra d'Azur, e recomanda a las electritz e als electors de se determinar liurament per l’abstencion, un vòte blanc o nul, o un vòte de « mens marrida causida », compatible amb las nòstras valors umanistas e progressistas.

En Lengadòc Rosselhon e Miègjorn Pirenèus lo Partit de la Nacion Occitana participèt per la primièra votacion a la candidatura lo « Ben Comun » del Christophe Cavard.

Grandmercejam totes los e totas las que se faguèron portar, que participèron d’un biais o d’un autre a-n-aquesta campanha, sens oblidar las electritz e los electors que nos portèron. La campanha de terren es estada de las positivas.

La lista lo Ben Comun farà votar per la lista eissida de la fusion de las còlas Delga e Onesta. Lo Partit de la Nacion Occitana se desolidariza d’aquesta crida.

Lo Partit de la Nacion Occitana fa una crida per alestir las escasenças venèntas en tot debatre dels problèmas de fond en contunhant d’ensajar de convéncer. Lo jorn vendrà que los progressistas autonomistas e independentistas occitans seràn majoritaris dins las institucions democraticas e federalas occitanas

p-n-o@laposte.net

joan.peire.alari@gmail.com

http://lo.lugarn-pno.over-blog.org/

10 carrèra de Romàs

47000 Agen

06 76 47 32 12

9 de decembre de 2015

Partit de la Nacion Occitana.

Partit de la Nacion Occitana.

Tag(s) : #OC