Overblog Suivre ce blog
Editer l'article Administration Créer mon blog

COMUNICAT

4 d'octòbre de 2015

                    Cossí nomenar la region centrala d'Occitània ?

   Lo Partit de la Nacion Occitana rementa son oposicion al novèl descopatge de las regions :

- prepausa regions occitanas apesadas sus realitats umanas e en particular suls airals dels parlars d'Òc,

- balha la prioritat a una devolucion a las regions dels poders de l'Estat, fins al poder legislatiu, dins lors domenis de competéncia, e dels mejans correspondents, e a la bastison d'una inter-regionalitat occitana.

   En particular, lo Partit de la Nacion Occitana sosten las reivindicacions de creacion de regions autonomas d'Euskadi Nòrd e de Catalonha Nòrd, desseparadas de las novelas « grandas regions » previstas.

   Lo Partit de la Nacion Occitana rementa tanben sa causida de la denominacion « Occitània Centrala » per la novela region « Lengadòc-Rosselhon-Miègjorn-Pirenèus » : cal lo mòt « Occitània » per identificar clarament son occitanitat, mas pas solet, per respectar l'occitanitat de las regions vesinas.  Autras causidas amb lo mòt « Occitània » pòdon anar dins lo metèis sens, mes d'un biais mai o mens insatisfasent - encara que « Occitània-Catalonha » auriá l'avantatge de reconèisser las doas nacions.

   Al mes de setembre los cinc quotidians regionals del grop de « La Despacha » s'acampèron per prepausar a sos lectors un sondatge tocant al nom de la futura region recampant las ancianas « Miègjorn-Pirenèus » e « Lengadòc-Rosselhon ». Aqueste sondatge prepausava pas la denominacion « Occitània Centrala », nimai « Catalonha » o « Catalonha Nòrd », çò mens marrit pels Occitans era de votar « Occitània », e pels catalans « Occitània – País Catalan ».

   En desseparar las chifras dels presumits catalans e los dels presumits occitans, vesem que lo sondatge, que recampèt gaireben 100 000 responsas dins la part occitana de la region, nos pòt entresenhar de çò que pensan las Occitanas e los Occitans d'aquesta futura region : la proposicion « Occitània » arriba clarament en tèsta amb 32% dels sufragis presumits occitans (las denominacions mai votadas aprèp ela recampan entre 8 e 10% d'avís favorables).

   Las Occitanas e los Occitans sabon ara que vivon en Occitània. Mas ça que la, aquò's pas qu'un sondatge. Los conselhièrs regionals devon prepausar au govèrn francés lo nom de la region abans lo mes de julhet de 2016, e lo govèrn decidará abans octòbre de 2016 aprèp consultacion del Conselh d'Estat. Aquò significa que tendrán benlèu pas compte de la volontat populara exprimida per aquesta consultacion oficiosa. Aqueste Conselh d'Estat, institucion magèr de l'imperialisme francés, a ja anonciat que refusariá los noms a connotacion identitària : nos cal demorar vigilants e actius per impausar una apellacion qu'identifique « Occitània », emai, tant coma se pòt, « Occitània Centrala ».

   Amb aqueste sondatge la demonstracion es facha que de mercés al trabalh perseverant de las organisacions occitanistas culturalas e politicas, lo pòble occitan pren cada jorn un pauc mai consciéncia de son identitat nacionala. Lo Partit de la Nacion Occitana contunha d'obrar dins aquel sens.

Partit de la Nacion Occitana

10, carrièra de Romàs

47000 Agen

 <p-n-o@laposte.net>

Cossí nomenar la region centrala d'Occitània ?
Tag(s) : #OC