Overblog Suivre ce blog
Editer l'article Administration Créer mon blog

Lo Senat francés entèrra la ratificacion de la Carta europèa

            Tres jorns aprèp las manifestacions per las lengas regionalas a Montpelhièr, Karaez-Plougêr, Baiona, Estrasborg e Perpinhan, lo vòte del 27 d’octòbre passat del Senat de la Republica francesa entèrra la ratificacion per França de la Carta europèa de las lengas regionalas e minoritàrias, promessa n° 56 del candidat François Hollande pendent la campanha presidenciala de 2012.

            En 1999, França aviá signat pas que 39 dels 98 engatjaments d’aquela Carta e aviá ajustat a n'aquela signatura una « declaration interpretativa » que ne restrenhiá  la portada.

            La promessa  n° 56 de François Hollande èra solament de ratificar aquela signatura a minima.

            Una mesa en conformitat de França amb las nòrmas democraticas europèas (que son obligatòrias pels aderents novèls a l'Union Europèa) impausariá una revision constitucionala per dire de metre la Constitucion francesa al nivèl de conformitat amb las nòrmas europèas de la Carta, e non pas l'invèrs. Lo minimum desirable seriá que França soscriguèsse d'engatjaments novèls demest los 59 demorants.

            Pel Partit de la Nacion Occitana, la ratificacion de la Carta basta pas ! Aquesta deu èsser acompanhada del vòte d'una lei balhant un estatut oficial a las lengas de França.

            Un còp de mai, lo Partit de la Nacion Occitana denóncia la duplicitat del President de la Republica. D'efièch, alara que pendent d'annadas l'esquèrra èra majoritària a l'Amassada Nacionala e al Senat, esperèt de pèrdre la majoritat al Senat per prepausar la reforma de la Constitucion sus aqueste sicut. O faguèt en sapient pertinentament qu'aquò deveniá tras que malaisit a obténer. Lo Partit de la Nacion Occitana denóncia tornamai la complicitat de fach entre esquèrra e drecha francesas per contunhar lor politica d'eradicacion de nòstra lenga.

            Delargam una crida als Occitans e als autres pòbles de França per bastir amassa un projècte de societat que siague pas mai marcat per "l'ideologia francesa" arcaïca, regda e uniformatritz. Desaprovam "l'excepcion francesa". França, país auto-proclamat dels "dreches umans" nos refusa un drech fondamental reconegut en Euròpa: lo de parlar sa lenga dins totas las circonsténcias de la vida vidanta en societat.

            Lo Partit de la Nacion Occitana s'associa a totas las iniciativas presas pels Occitans e pels autres pòbles de França per metre un tèrme a la desaparicion programada de nòstras lengas.

28/10/2015

p-n-o@laposte.net

http://lo.lugarn-pno.over-blog.org/

10 rue de Romas

47000 Agen

06 76 47 32 12 

Lo Senat francés entèrra la ratificacion de la Carta europèa

Lo Senat francés entèrra la ratificacion de la Carta europèa

Tag(s) : #OC