Overblog Suivre ce blog
Editer l'article Administration Créer mon blog

Lengas de França : Fàcia al mesprètz del govèrn, passèm a l'accion !

   Lo candidat Hollande del temps de sa campanha electorala de 2012 aviá promés : "Ratificarai la Carta Europènca de las lengas regionalas o minoritarias". Una majoritat de deputats votèron lo principi de la Ratificacion de la Carta. Aquela d'aqui o es tot jamèi pas.
   La reforma territoriala es estada una calamitat que prenguèt pas en compte lo costat linguistic e cultural dels territòris per la creacion de las novèlas regions. La reforma del collègi farà disparèisser l'ensenhament de la lengas ditas regionalas, a la rentrada de 2016.
   Plan mai que lo non respecte de las promesas fachas, l'abséncia de responsa del govèrn mòstra lo seu prigond mesprètz per las lengas e culturas autras que la francesa sul territòri de la Republica.
   Lo Partit de la Nacion Occitana sosten doncas la cauma de la fam del David Grosclaude, conselhièr regional d'Aquitània delegat per las lengas regionalas, entamenada dins la sala d'espèra de l'Ostal de Region a Bordèu lo dimècres 27 de mai de 2015 per denonciar l'abséncia de responsa de l'estat.
   Aquel darrièr deu publicar un decret per balhar una seguida al projècte per la lenga occitana votat en junh de 2014 per las Amassadas regionalas d'Aquitània e de Miègjorn Pirenèus.
   Lo Partit de la Nacion Occitana crida totes los e las que reivendican la preservacion e lo desvelopament de la lenga occitana de sosténer lo passa carrièra de Peireguèrs del 6 de junh de 2015 e tot parièr per la mobilizacion mandada per la "Coordinacion per la lenga occitana", per una granda manifestacion unitària lo dissabte 24 d'octòbre que vèn a Montpelhièr per afortir tornar mai los dreits de la nòstra lenga e sa legitimitat.

Partit de la Nacion Occitana,28/05/2015

Partit de la Nacion Occitana

Partit de la Nacion Occitana

Tag(s) : #OC