Overblog Suivre ce blog
Editer l'article Administration Créer mon blog

SEGOND TORN DE LAS ELECCIONS DESPARTAMENTALAS 2015

COMUNICAT DEL PARTIT DE LA NACION OCCITANA

Dimenge venent, dins la màger part dels cantons, las electritz e los electors d'Occitània son apelats a causir sos conselhièrs despartamentals.

Pel prumièr torn, lo Partit de la Nacion Occitana los apelava a denegar sos vòtes als candidats dels partits franceses, e a los balhar als candidats que portavan una reivindicacion avalorant nòstra identitat occitana : atal, sosteniá los candidats dels partits e movements politics occitans alígant una reivindicacion autonomista e un anar autonome, emai tanben los candidats « liures e independents entau Gers » que portavan de son biais las premissas d'una tala alternativa ; dins los cantons tròp nombroses onte mancàvan talas candidaturas, lo Partit de la Nacion Occitana recomandava un vòte blanc o nul de protèsta.

Los candidats sostenguts per lo Partit de la Nacion Occitana an obtengut resultas onorablas, an fach la pròva bela qu'es possible de prepausar una alternativa occitana, mas degun d'eles demora pel segond torn. Lo Partit de la Nacion Occitana recomanda tornamai un vòte blanc o nul de protèsta. Mas cal tèner compte d'enjòcs particulars :

- dins mantun canton, la drecha extrèma será presenta al segond torn, amb un programa e de valors incompatibles amb los nòstres ; representa una fòrma extrèma del nacionalisme imperialista francés que ne patissem : cal, tant coma se posca, l'empachar de ganhar dins aquelas eleccions !

- dins d'autres, aquesta eleccion ofrís una escasença de portar al conselh despartamental de femnas e d'omes mai favorables a una politica avalorant la lenga e la cultura nòstras, los podem sostèner sens nos illusionar sus l'amplor e la portada de sos engatjaments occitanistas, subordinats a sas aleujanças als partits franceses.

25 de mars de 2015

PNO / 10, car. de Romàs / 47000 AGEN / p-n-o@laposte.net / http://comunicat-pno.over-blog.com/

SEGOND TORN DE LAS ELECCIONS DESPARTAMENTALAS 2015 / P.N.O. /

SEGOND TORN DE LAS ELECCIONS DESPARTAMENTALAS 2015 / P.N.O. /

Tag(s) : #OC