Overblog Suivre ce blog
Editer l'article Administration Créer mon blog

Crida per un passa-carrièra novèl per la lenga occitana

De 2005 a 2012 quatre passa-carrièras « Anem Òc ! per la lenga occitana ! » (Carcassona en 2005 e 2009, Besièrs en 2007 e Tolosa en 2012), mobilizèron un nombre creissent de participants per aténher los 30.000 a Tolosa.

Lo 31 de mars de 2012, pel primièr còp, nòstres amics alsacians, bascs, bretons, catalans, se coordinèron amb los occitans e menèron lo meteis jorn de passa-carrièras parièrs per nòstras lengas.

Dempuèi 2012, los organizaires d’aqueles passa-carrièras prepausan de tornar cridar a desfilar que las reivindicacions avançadas son totjorn insatisfachas.

En seguida dels repòrts successius de las eleccions departamentalas e regionalas, sembla ara que lo moment oportun per d’accions d’aquela mena seriá a la tardor de 2015, abans las eleccions regionalas. Coma en 2012, i a pas unanimitat sus la forma e la localizacion d’aquelas accions: gran passa-carrièra pan-occitan o accions localas multiplas.

Aquelas divergéncias empachèron pas en 2012 Calandreta et l'I.E.O. de bailejar una coordinacion que organizèt lo passa-carrièra de Tolosa, e aqueles que lo refusavan fin finala i participèron.

Uèi, l'I.E.O. e Calandreta serián favorables a un novèl passa-carrièra pan-occitan, en coordinacion amb los autres pòbles de l’Estat francés. Lo Partit de la Nacion Occitana i es favorable tanben e ditz qu’es temps de lo preparar concrètament dins l’unitat la mai ampla que se pòsca.

Quitament se la responsabilitat d’aqueles passa-carrièras es de costuma a la carga de las organizacions culturalas, lo Partit de la Nacion Occitana lança una crida als autres partits e organizacions politicas occitanistas per s'asociar a aquel procediment, participar a las iniciativas localas e pan-occitanas dins aquel sens e las sosténer.

Partit de la Nacion Occitana

24 de genièr de 2015

Crida per un passa-carrièra novèl per la lenga occitana

Crida per un passa-carrièra novèl per la lenga occitana

Tag(s) : #OC