Overblog Suivre ce blog
Editer l'article Administration Créer mon blog

Lo Partit de la Nacion Occitana favorable al barratge de Sivens

       A la debuta del projècte (la comission d'enquista es de 2012), qualques ribairencs del futur barratge se recampèron en associacion de defensa. Lor vigilància, indispensabla en democracia, permetèt d'impausar als portaires del projècte que la legislacion en vigor siá rigorosament respectada e aplicada.

Mas lèu los Occitans de l'endrech foguèron despassats per una volada d'ecologistas "professionals" venguts d'un pauc de pertot en França. Aquel monde comencèron per venir ocupar fisicament lo terren sens que degun lor age demandat quicòm. En meteis temps copavan los camins de l'endrech. Confrontats als metòdes autoritaris e dangeiroses d'aquel monde, los estatjants de l'endrech demandèron la protècion de las fòrças de l'òrdre. D'unes ribairencs, pr'aquò directament concernits per la bastison del barratge, descorats, quitèron de militar contra la bastison del barratge.

       Las practicas de terren dels novèls venguts (per d'unes de marginals que van d'ocupacions en ocupacions) foguèron violentas tre lor arribada. Violéncias verbalas envèrs d'unes ribairencs als quals lor foguèt reprochat de "saber pas resistir". Seriá plan long de far lo decompte de totas lors malafachas dins lo país: veituras pinturluradas, parabrisas embrenicats, veirinas de magasins espetadas a Galhac, etc…

       Un comportament irresponsable que susprenguèt tot lo monde. Un biais de far que truquèt los quitis ecologistas locals. Los sacamands foguèron lèu fòragetats per la granda majoritat dels Albigeses. A tal punt que lo 4 d'octobre de 2014 una manifèstacion de protèsta contra lo barratge de Sivens recampèt pas que 400 personas. Pauques foguèron los Albigeses que participèron al passa-carrièra. La cèrca contunha de provocacions e d'afrontaments contra la fòrças de l'òrdre riscava de desembocar sus un drama. Çò que malurosament manquèt pas d'arribar.

       Causa coneguda siá: Tre la debuta le comitat Albigés del Partit de la Nacion Occitana foguèt favorable al projècte. Per principi aculhís favorablament tot agenciament adeqüat del territòri de la conmarca. Per nautres es una question de progrès e de desvolopament economic. En l'abséncia de dificultat tecnica, la bastison del barratge de Sivens deu èsser menat a cima. Las condicions geologicas e ecologicas permetent, aprèp los qualques acapçaments ja realizats, la construccion de la restanca, cap d'argument seriós s'opausa pas mai a l'acabament del projècte. Los trabalhs devon contunhar segon lo calendièr prealablament establit.

       Ça que la, lo comitat formula de resèrvas tocant al plan de finançament de l'investiment e del foncionament de l'obratge. Segon la règla que vòl que l'abenaire deu èsser lo pagaire, demanda a çò que la màger part de l'envestiment e la totalitat del foncionament de l'utís siá pres en carga pels organismes professionals que van beneficiar de l'estructura. Las modalitats de financiament devon èsser rectificadas. De modificacions son encara e totjorn possiblas.

28/10/2014

barratge de Sivens

barratge de Sivens

Tag(s) : #OC