Overblog Suivre ce blog
Editer l'article Administration Créer mon blog

Lo Partit de la Nacion Occitana e las eleccions europencas

Los resultats de las eleccions europencas del 25 de mai passat interpellan lo Partit de la Nacion Occitana.

Dins la circonscripcion Sud-Est, aquel d’aquí sosteniá la lista Alfonsi e dins la circonscripcion Sud-Oest la lista “Occitània per una Euròpa dels pòbles” menada per Martina Gros. Aquela lista qu’èra la sola exclusivament occitanista èra compausada per mitat de sòcis del P.N.O e aviá pas pogut integrar de bascs e de catalans.

La còla de campanha amb de mejans umans e financièrs limitats a pas pogut portar de bulletins de vòte dins totas las comunas dels 18 departaments e aviá comptat suls descargaments dels bulletins sul blòc, los papierons donats suls mercats e l’afichatge. Dins aquelas condicions, podiam pas far una marca bèla. Lo descargament dels bulletins de vòte demòra una practica marginala.

Los melhors resultats tan flacs que sián en comparason amb los partits màgers, son generalament dins de zònas ont un vertadièr trabalh de terren es estat fach. Las divisions dins lo mitan occitanista nos an pas ajudats tanpauc.

Los sòcis del Partit Occitan èran presents sus la lista ecologista del José Bové e, levat qualques excepcions, an votat per el. Maites culturals occitans èran reservats e mai opausats a nòstra lista. Solide, se pòt considerar que 878 voses sus 6 milions d’electors, es derisòri e pasmens aqueles esfòrces son pas estats inutils.

Martina Gros a rason de joslinhar que de fogals de reconquista se veson dins un cèrt nombre de departaments. Partent d’aquel pichon capital de simpatia, trobarem benlèu de militants futurs prèstes a se far portar a d’autras eleccions e nos inscriurem pauc a cha pauc dins lo paisatge politic coma lo movement Bastir ! ven de començar a o far amb sos 55 elegits a las eleccions municipalas.

Tot aquò, a condicion que lo trabalh de terren contunhe en defòra dels periòdes electorals. Pel moment sèm preoccupats per la pojada dels populismes dins l’Union europenca e mai particularament per la progression espectaclosa del « Front National » dins l’Estat francés e per l’abstencion massiva que marcan una desfisança e un regèt de l’Union europenca per una franja creissenta de l’electorat.

Lo « Front National » qu’a pas jamai agut lo poder patís pas del descrèdit de la classa politica jutjada incompètenta o corrompuda. Abòrda sens tabós lo problèma de l’identitat, de l’immigracion incontrarotlada e de l’arrogància dels tecnocratas europencs. Prepausa d’idèas simplistas coma la sortida de l’èuro, lo proteccionisme, lo retorn al prat carrat francés, la proteccion dels emplecs  a lasqualas de ciutadans nombroses que son pas brica faissistas aderisson.

Davant aquel chovinisme xenofòbe, l’excellent programa pro-europenc de la lista Martina Gros a pas pesat.

Los nacionalistas independentistas occitans seràn  fisables dins l’avenidor sonca se fan mens d’ideologia e ensajan, sens demagogia, de respondre als laguis de las gents ordinàrias. Sèm pas condemnats a demorar eternalament marginals. Al lòc de plorar sus nòstra flaquesa, nos cal regussar las margas que l’independéncia es pas per deman. Lo terren, res que lo terren.

Los militants del P.N.O deuràn d’ara enlà sosténer o s'integrar dins los movements socials, lo cultural, falsament, estant pas considerat coma partida del domeni politic. Vaquí la clau de nòstra liberacion nacionala futura que se farà sonca se los occitanistas de totas tendéncias s'unisson. Los apelam a bastir amb nosautres l’Occitània de deman.

28 de mai de 2014

Lo Partit de la Nacion Occitana e las eleccions europencas

Lo Partit de la Nacion Occitana e las eleccions europencas

Tag(s) : #OC