Overblog Suivre ce blog
Editer l'article Administration Créer mon blog

Comunicat :

Quina reforma territoriala per la Republica francesa ?

Aprèp doas annadas de patetariás sul pretendut « acte tres de la descentralizacion », lo novèl govèrn francés tòrna a las practicas de la tradicion centralista e tecnocratica.

Las 21  regions metropolitanas son apeladas a fusionar per aumentar lor talha e reduire lor nombre a 11, en foncion de critèris unifòrmes, sens consideracion per lor diversitat sociala, istorica, culturala (especialament lingüistica) ni per las volontats de las populacions tocadas.

Al lòc de delegar de competéncias novèlas a las regions e de lor autrejar los mejans politics e budgetaris correspondents, lo govèrn envisatja de lor retirar tornarmai la « clausa de competéncia generala », suprimida jos Sarkòzi en 2010 e restablida en 2014 (!)

Lo Partit de la Nacion Occitana rapèla sas posicions :

- per l'autonomia e la cooperacion de totas las regions e collectivitats occitanas dins l'Estat francés e delà de sas frontièras.

- per lor redefinicion en foncion de las identitats lingüisticas e culturalas (en particular en enclusent las zònas occitanas perifericas) e non pas de manièra tecnocratica mas en consultant las populacions tocadas par referendum.

- per la restructuracion de l'espaci occitan pel mièg dels « païses » que devon remplaçar los departaments coma collectivitats de proximitat.

- per un refortiment dels poders e dels mejans financièrs de las regions, per que pòscan estimular lo desvolopament economic e asegar lo territòri.

Lo Partit de la Nacion Occitana s'opausa donc a de regropaments eterogèneus, coma aqueles envisatjats entre Aquitània e Lemosin d'un costat e Peitau- Charenta de l'autre, o entre Ròse-Alps e l'Auvèrnha (conven al contrari de destacar Dròma e l'Ardècha de Ròse-Alps).

S'opausa tanben al dògma de la necessitat de grandas regions que impausarián als bascs e als catalans de s'integrar dins de regions occitanas mentre que reinvindican amb rason de collectivitats especificas. Per tornar definir pel melhor los territòris regionals, cal poder tornar definir tanben d'unes territòris departamentals.

Per lo Partit de la Nacion Occitana, las regions occitanas devon èstre definidas tan coma se pòt en foncion de las solidaritats e proximitats constatadas dont un indicator es la lenga occitana que lor es comuna. De mai, la revitalizacion de l'espaci central d'Occitània necessita la reconeissença e la valorizacion d'una identitat guianesa, de Brageirac à Menda. De regropaments son possibles entre aquelas regions, dins le respècte de lors personalitats respectivas e en essent que las populacions tocadas los aproven.

Partit de la Nacion Occitana

22 d'abril de 2014

Partit de la Nacion Occitana : Quina reforma territoriala per la Republica francesa ?

Partit de la Nacion Occitana : Quina reforma territoriala per la Republica francesa ?

Tag(s) : #OC