Overblog Suivre ce blog
Editer l'article Administration Créer mon blog

Lo comitat albigés del Partit de la Nacion Occitana protèsta contra la substitucion d'identitat a Castras e dins las comunas albigesas

Los Conselhs Municipals baptejan de carrièras novèlas e ne desbaptejan d'ancianas. Sovent, tanlèu que se tracha de balhar lo nom d'una personalitat recentament desapareguda a una via, fan çò que lor pareis lo melhor sens soscar a l'origina del toponime que s'aprestan a getar al desbrembièr. D'unes elegits son a l'ora d'ara talament aculturats que sovent coneisson pas l'etimologia de cèrtas denominacions originalas, qu'en çò nòstre son naturalament occitanas.

Fa pas gaire, lo Municipi de Castras volguèt rendre omenatge a un de sos enfants en balhant a una via publica lo seu nom. La tòca legitima de la municipalitat es de perpetuar lo nom de Pèire Fabre, lo farmacian de la vila vengut l'industrial farmaseutic que sabem. Vertat que l'òme foguèt un benfachor per Castras, e mai que mai pel Castras Olimpic, l'actual campion de França de rugbí a XV. L'implantacion de mantunas usinas e laboratòris dins l'encontrada, creèt fòrces emplecs dins lo bassin de vida del Sudalbigés.

Mai se Pèire Fabre faguèt fòrça pel rugbí, lo comitat albigés del Partit de la Nacion Occitana regreta que faguèt pas jamai res per la lenga e la cultura nòstras. La causa seriá estada ça que la possibla que Pèire Fabre parlava occitan. Regretam qu'age pas assumit aquesta part de son identitat pregonda.

Fin finala, la municipalitat de Castras decidiguèt de desbaptejat la plaça de l'Albinca per li balhar lo nom de "plaça Pèire Fabre". Aquesta plaça se trapa aquí ont i aviá autrecòps la Pòrta d'Albi, autrament adjectivisada Pòrta "Albinca". L'Albinca a Castras es mai qu'una plaça, es un barri. Es un luòc presat dels Castreses. Es aquí que de plan temps se ten lo mercat cobèrt. L'Albinca es tanben estada parròquia. Quand òm es dins Castras "anar a l'Albinca", es anar endacòm mai, coma dins un vilatge a despart. Segurament que, malgrat lo cambiament de nom, lo monde contunharan pendent qualques decennis "d'anar far lo mercat a l'Albinca".

Aquela desoccitanisacion dels toponimes reven a despersonalisar la vila. Ja la carrièra Nausinaiguièra venguèt la carrièra del baron Cachin, la carrièra del Panadeutes venguèt la carrièra Pèire Borèl, la plaça Romiuva venguèt la plaça plaça "Roumive", etc... Los exemples se porián multiplicar a l'infinit que çò que se passa a Castras se passa dins totas las comunas d'Albigés. Cada jorn perdem un pauc mai de nòstra personalitat. Per dintrat dins la metafòra farmaceutica, siem de longa fagocitat per de cellulas estrangièras al nòstre organisme societal. S'a n'aquestas sornarudas atacas reagissem pas lèu, serem lèu completament digerit, aicí coma endacòm mai.

Atanben, per la vila de Castras prepausam al municipi de gardar la denominacion "Albinca" coma es, e de desbaptejar puslèu la carrièra d'Austerlitz, simbòl de l'imperialisme francés, per li Balhar lo nom de Pèire Fabre. Per la meteissa escasença li suggerissem de raiar de la nomenclatura de sas carrièras lo nom del racista e colonialista Jules Ferry e lo cambiar per lo de Nelson Mandelar, apostòl de la libertat, de l'egalitat e de la fraternitat. Fariá atal òbra de salubritat publica, en melhora acondança amb las valors umanistas occitanas.

Partit de la Nacion Occitana

Comitat albigés

47, avenguda Charles de Gaulle

81370 Sant Sulpici la Punta

Comunicat de premsa N° 1314

 Castras : substitucion d'identitat

Castras : substitucion d'identitat

Tag(s) : #OC