Overblog Suivre ce blog
Editer l'article Administration Créer mon blog

Cap a la ratificacion de la Carta europenca

Lo Partit de la Nacion Occitana se fai gaug de l'adopcion per l'Amassada Nacionala francesa d'una prepausicion de lei constitucionala cercant a permetre fin finala la ratificacion per la Republica francesa de la Carta europenca de las lengas regionalas e minoritàrias, prèp de trenta-dos ans aprèp son adopcion pel Conselh de l'Euròpa emai prèp de quinze ans aprèp sa signatura. Espera que lo procediment atal entamenat capite amb la ratificacion de la Carta emai l'adopcion de mesuras legislativas qu'asseguren la defensa emai la promocion d'aquelas lengas dichas "regionalas", coma l'occitan.

Lo Partit de la Nacion Occitana se làguia pasmens que la revision prepausada de la constitucion francesa i inserisca paradoxalament clausulas restrictivas que fins ara son pas que del domèni de l'interpretacion del tèxte constitucional, emai emmalisson sa contradiccion amb los principis dels "Dreches de l'Òme" e de la "liura determinacion dels pòbles" pasmens afortits dins son preambule. De fach, consí pretendre que l'egalitat de totes los ciutadans e lo refús de las discriminacions empachen de reconéisser que los dreches lingüistics son per natura dreches collectius de los que recampa una communautat de lenga, emai foguesse dicha "regionala" ? Emai consí assegurar la promocion d'aquelas lengas en tot acertir que l'usança del francés s'impausa als actors e usatjants dels servicis publics ? Aquela darrièra clausula, presa a la letra, pòt justificar l'interdiccion de l'usança de l'occitan dins las raras emissions de FR3 que l'emplegan o coma lenga de vida de l'escòla (pas sonque coma objet d'estudi) dins las escòlas immersivas Calandretas.

Lo Partit de la Nacion Occitana merceja los parlamentaris que contestèron aquelas disposicions restrictivas, emai convida lo poder constituent de precisar que la caracterizacion del francés coma "lenga de la republica" se dèu pas far en prejudici de la necessària accion publica per nòstras lengas.

Lo Partit de la Nacion Occitana rementa que França, quora signèt la Carta en 1999, s'engatgèt pas que per 39 disposicions, sus prèp d'un centenat, çò qu'es fòrça prèp del minimum requesit de 35 ; demanda qu'engatjaments complementaris sián pres tre sa ratificacion qu'espèra pròcha, emai qu'una politica lingüistica de sosten resolgut a nòstras lengas siá realizada, apiejada sus una lei-encastre.

28/01/2014

Cap a la ratificacion de la Carta europenca

Cap a la ratificacion de la Carta europenca

Tag(s) : #OC